الهاتف الساعه تنين داير رنـه
صوت بنت قتلي بنبي تستنـه
قتلي
نبي_نحكيلك
والعين ما شبعت من تكحيلك
اني عاشقاتك يا جميل فجيلك
وطيبت قليبك مسمحه ما حنه
نبيك ما تصكر جيت بي نرويلك
ومازال شوق خبر ياما منه
قلتلها تو في خاطري قلت شدت
انتي_منو_غير_قوليلي
ماني مصكر بي النبي تحكيلي
صوتك خداني وقلت و وك حليلي
شدت وما شدت و شينك غنه
اللي بنعرفه تكوني نديدة جيلي
زعم قصتي تبدا من اول رنه
قالت
والله_ماهي_بيدي
حت ان كنت صغير موش نديدي
اني وين شفتك قلت هدا ريدي
تو كيف نبي نفهمك يا حنه
وفي شفتك ضحكي غلب تنكيدي
هي خودني للخاص شن تستنه
قلتلها
غير_استني
راهو الخبر من القلب طالع مني
لكن انتي شكلك كبيره عني
عزوز شارفه ما عاد فيها بنه
وفتي حدود الاربعين بضني
كيف من صبغ راسه بكمشه حنه
وما تزعلي راهو الخبر كدرني
فيه فرق بين النار بين الجنـه
طبعآ تكدرت احرف مني وزعلت؟
ياريتني_ماجيتك
وياريت بالعين لا ما ريتك
اخساره اني من دونهم حبيتك
و عاد قلت يسي تو على يدنه
كلامك وجعني ريتني ما هويتك
من الاوله قلبك عدم محنه
قلتلها
قلبي_نضيف_وصافي
ولا نجرحك لا نقربك لا تخافي
غير عمرنا يا بنت ماهو وافي
وحق من خلقني القلب ماهو منه
وخليك عاديه علاش تجافي
كي صاحبك يا غاليـه نتمنـه
وخلي كلام الحب تحت السافي
انتي عارفاته القلب شن يستنـه
تأليفي
و كلماتي
عبدالمالك السايح
