غلاك غلاك ذابحني غلاك
نعيش نموت نتنفس هواك
بمّاسك اتجر
وتذبح فيّ ذبحان ألبقر
واستسلمتلك طاعة وبر
ماهي غايتي هية رضاك
نحبك موت ماهو حب ذر
وحب اليّسا وحب الأتراك
نحبك علن ماهو حب سر
حتی إن كان في حبك هلاك
ونعشق فيك ياشبه القمر
ونشبح فيك منظر يا حلاك
غلاك سكن فية واستقر
مانشبح أمامك لا وراك
حرقته حرق صدري بي لبر
نقشته نقش فضلوعي اسماك
انت نبض قلبي والنظر
وذابت ذوب كبدي في شواك
وانت ورد في صيفي زهر
الله الله ع ريحة شذاك
وانت نهر ينبع م البحر
زمزم بس اعذب منه ماك
وانت عرق ينبض في الحجر
فقلب الصخر سبحانه احياك
نحبك حب صحرا للمطر
ايصب الغيث وينبّت نواك
نحبك حب ميسي للكور
وكيف يدير في كل الشباك
انت وكر مامنك مفر
انجيك انجيك ما نحيا بلاك
وكان بعدت مانغيبش شهر
عرق الحن يجبدني قداك
وانت حلو حتی كان مر
والفرات ماهو في حلاك
وانت دوم فعيوني أغر
حتی ان كنت ياغالي Black
وحتی كان ظرفك ما يسر
وحتی كان مبتوره يداك
وحتی طاح خشمك وانكسر
وحتی كان غارق في دماك
وحتی كان ماعندك زهر
قليل البخت واللي جاك جاك
لما كان يحكم فيك حر
ياما ناس عاشوا في زهاك
فعل الخير فيهم ما ثمر
اول ناس طعنوا في قفاك
حظك معفنه ملحك ذكر
لا والله مش هذا اكفاك
وحتی كان فعيونك امذر
اعمي صرت يامعفن عماك
وعل خاطر الناقه وسي عمر
خوتك هجروا منك ابناك
غلبوا فيك جابولك كفر
صخنت لرض واسمم مداك
وحتی إن كان فذيالك اتكر
وتحكم فيك مجموعة اهفاك
انت وطن لقدامي مقر
غصبا ع الظروف وعل اعداك
وانت وطن لو حتی اقصر
عالي بيك راسي في سماك
نشبح فيك في ثقلك اتجر
وحاسس بيك وين تقول وااااااك
عشر سنين جملك ماهدر
عشر سنين يبلك في خلاك
عشر سنين صيفك ماضهر
عشر سنين يا مطول شتاك
عشر سنين كسرك ماجبر
عشر سنين قيلاتك احذاك
وقت مشوم ومصيره ايمر
ايدور الوقت وانعلوا بناك
وانشيلوك من قلب الحفر
نبدو خوت واردوا ثناك
واللي تو من هول وغتر
ونار وحرب قعده باك باك
تقعد ذاكره وتقعد صور
نقولوا صار في عامك هذاك
وطن البدو ياوطن الحظر
بذن الله ما انديرش عزاك
وصلوا معاي عل خير البشر
وقولوا يالله عجل شفاك ....
غلاك غلاك ذابحني غلاك
نعيش نموت نتنفس هواك
عم عائشة
