بعث
لي صديقي خليفة لوصيف ابن قرقارش قصيدة كتبها بحنينه لمراتع الصبى ورسم
لنا بوجدانه لوحة شعرية تغذيها لواعج فاضت فيه وثملت ..صور علقت بوجدان كل
قاطني قرقارش من زمن ليس ببعيد حيث كانت الزراعة والصيد البحري مهنة
توارثها الابناء والاباء قبل ان تغزوها الكتل الاسمنتية وإزالة ملامحها
الاصيلة واندثار موروثها الجميل إلا مانذر..
بعتث بالقصيدة لبعض من الاصدقاء الشعراء وشارك كل منهم بردا يحاكي فيه بيئته التي استوطنت فيه وكانت المشاركات غاية في الروعة..
الباب مفتوح لكل من اراد المشاركة..
القصيدة تقول..
في وين ما تلقى
بحر وطويل النخل ومرسى علينا باينه
فى وين ماتسمع الدف
وحضره تزف والناس فيها هايمه
تسمع زغاريط النسى جاوي وعطر يفوح
هادوك هما هلنا
في وين ما تشبح انوار
وزحمه صغار ودنقه ونوبه حاميه
وفي وين ماتشبح جريد
بناره ايقيد وزحمة بنات فسانيه
بنجمة عروستهم زهو وهي بينهم تتمخطر
هادوك هما اولافنا
احكيلهم يا بوجناح
ماضي وراح
كيف كان شكل السانيه
كيف كان جدي في الزمان
مالي المكان من البير يملا جابيه
في روس النخل العرجون فوق ايذكر
هاديك هيا اوصولنا
وهادوك هما هلنا...
الشاعرة فارسة الصدارة..
وفي وين ما تلقى
ارمال عروق و اطوال جريدة نخلها دانيه
وفي وين ما تقوي
الشمس أكثر من امس و رمضه وطاها حاميه
وجرة خطاوي راسمتها اثارها
هاذوم هما هلنا
وفي وين ما تلقى
السمار داير امار علي ايدين تحصد جانيه
وفي وين ما تلقى
خضار نامي بعمار كلها روابي ناميه
دارت نشوق و عطره يفوح الفوق
هاذيك سيرة هلنا
وفي وين ما تلقى
اخيم كلها ملم وجموع فيها ماليه
ومع وين ما زادت
سلام وقدر احترام ومن فضل ربي جايده
هاذيك فرحة هلنا
وفي وين ما تلقى
بيوت بميلة حيوط والطين فيه البنه
اترجع ايامك مع الخوت و أم حضنها شاملنا
وفيها فنار شاعل انوار في ليل خفنا منه
هاذيك زهو ايامنا
الشاعرة دكتورة عايدة اللطيف شيحة..
في وين يمتد الجناح
بر وبراح..
.وفيها النسمة صافية
في وين ماتشبح عرب
اشراف النسب..
اصحاب القلوب الدافية
وفي وين ماترتع البل ..
تبري العلل ...
وهي صادرة وهي لافية...
وفي وين شعال الوطا...
.ورمل وحصى
اهل الشعر والقافية
في وين ماتشبح انقاب
وود وعتاب..
ماتخفى عليهم خافية
في وين مايريض الغزال
اكرام الخصال
حتى ورجله حافية
في وين ماتشبح بنات
زين وثبات
حنونة وماهي جافية
هاكوم هما هلنا ...وهاكي مناهلنا
في وين يمتد النظر..بر وبحر..بدو وحظر
هذوك هما هلنا وهذيك هي ليبيا..وهذيك
هي بلادنا
الشاعر امين بيت العافية..
وفي وين ماتلقى نخيل طويل
وتلاقي الساحل والنسيم عليل
وتلقى قوارب والبحر داعبها
هذيك هي طرابلس وعربها
وهما زهي للنفس هم طربها
في وين ماتلقى رجال اجواد
وتلقي كرم في البيت والميعاد
تلقي المحبة الصافية
وتلقي مشاعر دافية
هذوك هم اهلنا
وهذوك هم اصلنا ومفصلنا..
الشاعر الصادق الطنطاني..
وفى وين مابان الجبل بظله سدل
واشعاب وسطه راسية.
وبانت نجوع كيف الشموع
عند الغروب بنوار تضوى ماسية.
صناديد مايدارو الرجوع
فئ شد الصروع بيهم صحارى عامرة.
وجود وكرم وعز ونغم
بالطيب ماهى قاسية.
فى خاطرى زادت جروح وصاعب نبوح
واطباع فيا عاصية.
وتصفن كما موج البحر
وقت ان تمر
فيها المراكب عايمة.
وفيها القمر بنوره بهر
على وطن عامر جايبة.
ياالله خلاق البشر اسلام وكفر
تهنى بلادى الحايسة..
الشاعر الطاهر احمد احفيظ
في وين ماتلقى كرام وأهل العز وشريعة إسلام
هادوك هماهلنا
في وين ماتلقى عرب وعز النسب
أهل الحن والقلوب الرحيمة
مزين فرحهم دفه ضرب وخيام تنصب
إطعام الضيف لو يبدى غريمه
شعر ومرح يكسوه الطرب هيام وحب
والضحك والتبسيمة
مايعرفوا حقد وغضب وللرائ شايب
وليه قدر عالى وقيمه
كثير خيرهم ماينضب من الله ينصب
بنية نضيفة سقيمة
هم أهلنا وللهم الحب لقاهم طرب
ومحال تلقى غشيمه
سوانى وابيار تدعب وطوابي عجب
واديار هلها مقيمه
عمار مالفجر طارب نخيل وعنب
وزيتون اسطاره سقيمه
جداول ساروط يدعب من كل ماتحب
وللجار ديمة القسيمه
نخيل وجريد ورطب وصناع للرب
وكل شي عنده القيمه
وأطفال جماعات تلعب لايعرفوا سب
بينهم أخوة قديمه
هلنا اللي حبهم حب للهم نسب
والشرف عالى وقيمه
براكين لغضب إن جاهم الغاصب
ومايعرفوش الهزيمه
كما نهر يدعب بالغضب تنصب
أهل الرماية السقيمه
عقاد خيلهم ماتشوب العدوان ترعب
تكسر ايدين الظليمه
عشاق للوطن والرب وللبيت ترغب
منازل محمد عظيمه
أهلنا إسلام وعرب ويسودنا حب
والقلوب ديمه رحيمه .
الشاعر نزار الطويل..
كانت واحة
زيتون وكرم وبليمها فواحة
وبعز المراجل ناسها صداحة
التاريخ يشهد وربي الكريم حماها
يوم جي الغازي ماعرف الراحة
علي بوابها صدوه بمناجلهم
مخاظت اللبن جابت اللي بهدلهم
وصل صيتهم لي عند سيوة ضناها..
